TUME YAENDESHA MAFUNZO YA HAKI ZA BINADAMU NA UTAWALA BORA

17th July 2014

Tume yaendesha mafunzo ya haki za binadamu kwa watendaji wakuu wa asasi zisizo za kiserikali, mafunzo hayo yamefanyika katika ukumbi  wa Dominic Nyakahoja jijini Mwanza. Mafunzo hayo yalifunguliwa na Katibu Mtendaji wa Tume ya Haki za Binadamu na Utawala Bora Bi Mary Massay. Katika mafunzo hayo Bi. Mary Massay aliwataka washiriki waweze kuzingatia mambo ambayo yatakuwa yanayotolewa na watoa mada. Mada zilizojadiliwa katika mafunzo hayo ni Tume ya Haki za Binadamu na Utawala Bora na jinsi ya kuleta malalamiko Tume kwa kutumia ujumbe mfupi wa simu ya kiganjani na Mpango Kazi wa Taifa wa Haki za Binadamu. Aidha, Katibu Mtendaji aliziomba asasi hizo kuweza kushirikiana katika kupiga vita uvunjifu wa haki za binadamu na ukiukwaji wa misingi ya utawala bora kwa kutumia njia za kuwasadia wananchi ili waweze kudai haki zao na kutoa taarifa Tume pindi haki hizo zinapovunjwa kwa kutumia ujumbe mfupi kwa njia ya simu ya kiganjani.
Aidha katibu Mtendaji aliwashukuru SIDA na The Swedish program for ICT in
developing regions (SPIDER) kwa kufadhili mafunzo haya.

16th July 2014

Tume ya Haki za Binadamu na Utawala Bora leo imefanya hafla fupi ya kuagana na mtaalamu wa masuala ya ulinzi na haki za watoto wa Shirika la Kimataifa la Kuhudumia Watoto (UNICEF) ofisi ya Tanzania Bi Rachel Harvey ambaye anahamia nchini Nigeria anakokwenda kuwa mkuu wa Kitengo cha kutetea na ulinzi wa haki za watoto.
Bi Rachel amekuwa akifanya kazi karibu na Tume katika kipindi chote cha miaka mine (4) aliyokuwa nchini, baadhi ya kazi alizofanya akiwa na Tume ni pamoja na kuratibu kazi mbalimbali kuhusiana na masuala ya haki za watoto katika mkinzano na Sheria; Mwaka 2011 Bi Rachel alishirikiana na ujumbe wa Tume kukagua magereza, vituo vya polisi, mahabusu ya watoto na shule ya maadilisho katika mikoa ya Mbeya na Iringa.
Bi. Rachel atakumbukwa sana kwa mchango wake mkubwa aliokuwa nao katika kuboresha haki za watoto nchini. Alishiriki kikamilifu katika kuandaa kanuni za sheria ya mtoto, kuwajengea uwezo wadau juu ya sheria ya mtoto Na. 21 ya mwaka 2009 na kushiriki katika maandalizi ya mkakati wa miaka mitano wa Haki za watoto unaoratibiwa na Wizara ya Katiba na Sheria.
Tume ya Haki za Binadamu itaendelea kuenzi juhudi za Rachel za kuunganisha taasisi zinazoshughulikia masuala ya haki za watoto katika mkinzano na sheria ambapo nyenzo mbalimbali za ufuatiliaji ziliandaliwa katika kufuatilia watoto katika vizuizi mbalimbali nchini.